Í Vestur-Barðastrandarsýslu og Ísafj-arðarsýslum eru fjalllendi og auðnir ráðandi, oftast 60-70% landsins. Rofeinkunn 3 (talsvert rof) er algeng, einkum vegna þess að mikið er um brattar urðir og jarðsil í grónum hlíðum. Rofdílar eru mjög útbreiddir þar sem heiðalönd eru gróin, sérstaklega í Vestur-Barðastrandarsýslu. Þá er vatnsrof algengt eins og vænta má í jafnbröttu landslagi. Lítið er þó um svæði þar sem rof telst mikið (rofeinkunnir 4 og 5) og að þessu leyti eru Vestfirðir betur settir en mörg önnur svæði landsins.

Hálendi á Vestfjörðum er ekki eins sendið og hálendið í nágrenni stóru jöklanna á miðhálendinu. Undirlendi er víða lítið og því er hlutfall vel gróins lands þar sem lítið rof á sér stað minna en ella í mörgum hreppum, oft á milli 30 og 40%.

Strandasýsla er yfirleitt betur gróin en Barðastrandarsýslur og Ísafjarðarsýslur, og þar er minna land sem fær rofeinkunn 3. Hlutfall þess lands, þar sem rof er lítið, er hærra, sérstaklega í Kirkjubólshreppi og Bæjarhreppi.